Lewi Bê Makyaj Rew Benê Huşk

Lewi zê çımanê, gere rınd bışevekiyê. Çermê lewa zaf teniko; va, serdo bêhemd, germo bêhemd, lewa qılaşnenora. Cara lewanê raqlaşiyaya makyaj meke! Vırêndiye qılaşanê lewanê xo weşke, hona makyaj bıke...

Lewi Bê Makyaj Rew Benê Huşk

Lewê rındeki şoretê her cêniyê! Çım û buriyê delali, sırotê sûri bê lewa kemi manenê; mıradê zafetene cêniye lewê tenıkê rındekê... Çı hêf ke her cêniye nê mıradê xo nêvinena! Çıke lewi, xusisı ki lewê cêniya, rew xerepinê. Tiji lewa xerepnena, va xerepneno, serd û germ xerepneno... Nê faktori pêro piya vırêndiye lewa kenê zûya. Lewi ke bi zûya nafa dormê lewade enfoksiyoni kunê kar. Nê enfeksiyoni pıra pıra her caê lewa cênê. Eke lewi bi enfeksiyonın nafa ki nata bota qılaşinêra; nê enfeksiyoni lewa têynade nêmanenê, zerê ê qılaşaro kunê her caê wıcıdı. Qılaşê lewa peyjo ki khul gırêdanê; her caê lewa beno pırê tholıfa. Nê nêweşiyê lewa zafêri rubalê zaf qefelyayêne, kemasiya vitaminanê C û B6ra vêjinê.

 

Cêni geganê xo be xo nê nêweşiya serhev kenê gıran! Tholıfanê lewa ebe desta cara qılaynenêra; cat kenê ke lewanê nêweşa ebe zorê makyaji wedarê. Halo niyanênde lewi taina verve xırabe şonê. Gorê estetisyena prensibê lewanê nêweşa nawo; lewanê xo vırêndiye weşke, hona makyaj bıke! Lewê raqlaşiyayê ke makyaj bênê, hem zaf xırabın asenê hemı ki wıcıdê cêniyede nêweşiyanê bina finê kar. Zê nêweşiyanê bina, derheqê lewade ki gere insan weşiyede xo qorikero.

 

 Eke lewê to qılaşiyêra, vırêndiye pomad ya ki gliserin ya ki ronê kakaoy pırake, hatani ke lewê to bi weş. Tholıfanê huşka ebe dest rameqlayne, ebe pomad nermke, dirê rojide ê be xo darinêwe. Krêmê qılaşa cara çentê xora kemi meke.

 

Lewi zafêri wertê zımıstani û wertê amnanide benê zûya, qılaşinê ra. Vırêndiya raqılaşiyayêna lewa ebe rujê de raşt zaf rehet êna guretene. Her ruj lewa qori nêkeno; cêni ke ruj hêrinenê, gere rujo ke lewa qorikeno ê bıjêrê. Taê cêni verê ruji pudra kenê lewanê xora; eke lewi zuyayê, ya ki qılaşiyêra, gere pudra pıra nêbo, çıke pudra serhev kena zûya. Rengê ruji û rengê makyajê çıma û ê sırota gere jûbinira nezdi bo. Hona ke ruj nêkerdo lewara, gere dormê lewa ebe qelema lewa bonciyo; rengê qeleme gere hebıkekê rengê rujira tari bo. Cêniya ke lewê xo qalındê (gırsê) gere qeleme kımever bonco, eke lewê xo tenıkê (qışkekê) o taw şikina taê hira bonco. Eke makyajira tepya serê lewa gurızın aseno, ebe jû peşkirê de qışkeke serê lewa gere fasale pak bone. Lewi gere zaf derg rujın nêmanê, eke bımanê rew benê gurızın. Cêni ebe şewe hona ke nêkewtêra, gere rujê lewanê xo rındek pak kerê hona rakuyê. Eke şıma xısmeta lewanê xo xelesnê, ebe nê lewanê weş û rındeka mêrdê xo, ya ki waştiyê xo paçi kerê hona rakuyê!..